Terassemarkisa, som også var i bruk for to dagar sidan - då sola som snarast var framom utpå ettermiddagen og kvelden, vart dessverre ikkje rulla inn att før vi gjekk til ro for natta. Neste dag var ho drypande våt, så no ventar eg på sola som visstnok skal komme att på fredag, slik at markisa får tørke opp att, og kan rullast inn...
Ungane har bada èin gang i Espelandsvatnet hittil denne sommaren. Mor sjøl er ikkje verken strand- eller badeløve, og har absolutt ingen problem med at det ikkje er badetemperatur eller badevêr. Og igrunn har eg ikkje så frykteleg stort problem med at det regnar heller... Ja - ikkje for det, det er jo flott med "sol og sommar", sjølvsagt, men eg er no ein gang slik laga at eg ikkje har ro i ræva. Eg er ei rastlaus sjel som ikkje gidd å ligge strekk ut på ei solseng. Det må no vere ein av dei mest unyttige "aktivitetane" som finst;) Ei heller klarar eg å sitte i ein stol med hendene i fanget og berre sjå ut i lufta - eller sjå ut på regnvêret for den del... Neidå, om det ikkje "går an" å gå ut fordi vêret ikkje innbyr til det, så manglar det ikkje på arbeid innomhus. Så eg sit slett ikkje i ro sjølv om eg ikkje får jobbe i hagen eller gå på fjellet. "Åja, ho har det sikkert strøkent i heimen", tenkjer du kanskje då? Eg kan trøste deg med at då tek du feil. Veldig feil. Eg skal ikkje gå inn på nærare detaljar der. Når det er sagt, så kan eg no legge til at eg skulle gjerne ha hatt det strøkent, for eg er eit ordensmennske, og trivast best når eg har det skikkeleg rundt meg - ryddig og reint. Men eg har med åra innsett at då må eg bu heilt åleine, om det skal late seg gjere å ha det slik... Vel, ikkje meir detaljar der, altså.
Men no spora eg visst litt av her. Det eg igrunn hadde tenkt å få fram, det var at for meg som må ha noko å henge fingrane i til ei kvar tid, så kan det på ein måte bli litt upraktisk med denne sola òg... På denne årstida stig temperaturen fort når sola kjem fram, og då slit Jannicke litt med å halde seg i vigør. Sveitteband er heilt sjølvsagt, for den minste fysiske ting eg skal gjere ute i hagen. Så viss eg fekk bestemme, så hadde vi hatt 17-18 grader og overskya opphaldsvêr det meste av sommaren;) Det er perfekt til både hagearbeid og fjellturar! Men eg har ikkje noko fullmakt til å bestemme kva vêr vi skal ha, verken sommar eller vinter. Heldigvis. Då er eg redd eg hadde blitt ganske upopulær...
Dagen i dag - regntung og grå |
Treng ikkje så mykje sol, men litt opphald hadde vore flott. I dag har det, som Vegard seier "pissregna" heile tida...... 20 grader og lettskya er greit. Men om dette været skal fortsette, ser eg mørkt på vinteren, den kjem til å bli svææææææææææært lang, er eg redd.
SvarSlett